 |
| Kovrili di omna 7 Ido-verki aparinta en 2024 |
Dum la tota yaro 2024 aparis la sequanta Ido-libri o -broshuri:
APGAWAIN, Niklas; HUGON; P.D., MOORE, J.L.; BEAUFRONT, L. de; RICE, S.L.; MUELVER, J.; CAPPELLUTI, G.: Ido for all. English course for learning Ido. Oxford. Twelfth Edition. Self-published 2024 by Kim Kaiser. xvi + 270 p. (pdf-edituro).
COSTALAGO, Vicente: Poemeti. 2024. 13 p. (pdf-edituro)
COSTALAGO, Vicente: La predicajo di Hakum. 2024. 28 p. (pdf-edituro)
NEVES, Gonçalo: Skopo nula. 30 haikuatra poemi originala. Espinho: Editerio Sudo, 2024. 32 p. (pdf-edituro).
PARTAKA (trad.): Khalil Gibran: Sablo ed spumo. Tradukita da Partaka. Barcelona. 2024. 69 p. (pdf-edituro)
SCHLEMMINGER, Günter (trad.):Wilhelm Hauff: La rakonto pri la mikra Muck. La kolda kordio / Die Geschichte vom kleinen Muck. Das kalte Herz. Bilingua edituro. Tradukuro: Günter Schlemminger. Berlin: Germana Ido-Societo, 2024. 140 p. (Ido-lektajo, kayero 10.)
SCHLEMMINGER, Günter (trad.): Joseph von Eichendorff: Ek la vivo di nul-valoranto / Aus dem Leben eines Taugenichts. Bilingua edituro. Tradukuro: Günter Schlemminger. Berlin: Germana Ido-Societo, 2024. 212 p. (Ido-lektajo, kayero 11.)
Yen kelka statistikal datumi pri la supera listo (inter parentezi, por komparo, aparas la korespondanta datumo de 2023):
Nombro de libri publikigita: 7 (16)
Nombro de verki originala: 3 (3)
Nombro de verki tradukita: 4 (13)
Nombro de autori / tradukinti: 5 (5)
Nombro de libri / broshuri papera: 2 (1)
Nombro de pdf-libri / -broshuri: 5 (15)
Distributo autorala: Costalago: 2 (0) verki; Schlemminger: 2 (1), Kaiser: 1 (0), Neves: 1 (2); Partaka: 1 (1).
Fonto-lingui dil tradukuri: Germana: 2 (1), Angla: 1 (11).
Nombro de pagini: entote 780 (1.286)
Meza nombro de pagini di singla verko: 111 (80)
Pos tri intersequanta yari tre fruktoza (24, 34 e 22 verki en 2020, 2019 e 2018, rispektive), pasable magra (ka?) yaro en 2021 (nur 9 verki), promisanta yaro en 2022 (13 verki) e pasable bona yaro en 2023 (16 verki), 2024 (nur 7 verki) esis magra (ka?) yaro, en qua la maxim granda novajo esis sen-dubite la manko di verki dal skripto-championo Brian Drake.
Tamen, omno esas relativa. Kompare a 2018-2020, la nombro de verki aparinta en 2024 semblas esar magra o ne-suficanta, ma, mea-opinione, ol esas “normala”, expektebla, o mem bona, nombro, se on konsideras la mikreso e konsisto dil nuna Ido-movado. En la yari 50a, 60a, 70a e 80a, exemple, ne aparis mez-nombre plu multa libri kam nun, quankam la movado esis plu granda e plu aktiva. Yen, exemple, la nombro de libri aparinta inter 1980 e 1984, segun mea koncepto di Ido-libro (qua esas min ampla kam olta uzata da Carlevaro e Haupenthal en sua Bibliografio di Ido):
1980: 0
1981: 3
1982: 2
1983: 2
1984: 1
Do, en la singla yaro 2024 aparis tam multa libri (7) kam en la tota yar-trio 1981-1983, kande la magna Andreas Juste esis ankore plene florifanta!
La nuna idisti do ne tristeskez nek desesperez: omno esas analizenda en la justa perspektivo.
Statistikala datumi pri omna Ido-verki aparinta en la periodo 2018–2024
Nun me duros prizentar la statistikala datumi pri la ensemblo de yari de kande me komencis sistematre revuar la literaturo di Ido (2018), nam to forsan interesos nia samideani, montrante tendenci pri bona o mala developeso.
Nombro de libri publikigita: 125
Nombro de verki originala: 54
Nombro de verki tradukita: 71
Nombro de libri / broshuri papera: 15
Nombro de pdf-libri / -broshuri: 110
Nombro de pagini: entote 12.964
Meza nombro de pagini di singla verko: 104
Nombro de autori/tradukinti: 23 (inter qui 6 esas mortinta)
Distributo autorala: Drake (59 verki!!), Neves (17), Madonna (16), Schlemminger (6), Carlevaro (5), Partaka (5), Sa (3), Costalago (2), Morin (2), Stuifbergen (2), Beaufront (1), Chandler (1), Cossío Ramírez (1), Haupenthal (1), Jacob, M. (1), Juste (1), Kaiser (1) Kasper, M. (1), López Rúbio (1), Pascau (1), Pontnau (1), Schmidtchen (1), Weston (1).
Fonto-lingui dil tradukuri: Angla (50 verki), Germana (11), Franca (5), Portugalana (2), Esperanto (1), Greka antiqua (1), Hispana (1), Latina (1), Valenciana (1). [9 lingui entote]
Nu, omna-kaze, existas nun multa Ido-libri lektebla e mem lektinda, por omna gusti e tendenci. On do sequez la konsilo da Juste, qua yene kronizis la prefaco di La Serchado:
“Agez kom bon lektero : do vu lektez...”
